Umusaseridoti ni intumwa y’impuhwe z’Imana n’umugabuzi w’ibyiza byayo-Mgr Antoni KAMBANDA

Muri uyu mwaka wa 2019, Diyosezi Gatolika ya Kibungo yibarutse Abapadiri batanu (5) aribo:

-Padiri Alexandre NKOMEJEGUSABA

-Padiri Phocas HABANABAKIZE

-Padiri Emmanuel IYAKAREMYE

-Padiri Félicien HAKIZIMANA

-Padiri Herbert HABUMUREMYI

N’umudiyakoni umwe (1) ariwe Diyakoni Adrien UWIRINGIYIMANA.

Ku cyumweru tariki ya 28 Nyakanga 2019 niho Padiri Alexandre NKOMEJEGUSABA yahawe Ubupadiri, abuherwa muri Paruwasi ya MUKARANGE, ari nayo avukamo.

Kuwa gatandatu tariki ya ya 10 Kanama 2019, muri Pariwasi ya Gashiru abahawe Ubupadiri ni Padiri Phocas HABANABAKIZE uvuka muri iyo Paruwasi na Padiri Emmanuel IYAKAREMYE, uvuka muri Paruwasi ya Rukira.

Kuri uyu wa gatandatu tariki ya 17 Kanama 2019, abahawe Ubupadiri ni Padiri Herbert HABUMUREMYI na Padiri Félicien HAKIZIMANA.

Mu Gitambo cya Misa cyaturiwe muri Kiliziya ya Katedrali ya Kibungo ari nacyo cyatangiwemo ubupadiri kuri abo bapadiri n’ubudiyakoni kuri Diyakoni Adrien UWIRINGIYIMANA, Nyiricyubahiro Musenyeri Antoni KAMBANDA yagarutse ku mpano y’Ubusaseridoti no ku butumwa Umusaseridoti akora.

Mu nyigisho ye ya Misa, Musenyeri Arkiyepiskopi wa Kigali akaba n’Umuyobozi wa Diyosezi ya Kibungo yibukije ko Imana ariyo yitorera mu muryango wayo, bityo Ubusaseridoti ni impano y’Imana

. Umuntu mu ntege nkeya ze ubwo butumwa bumutera impungenge nk’umuhanuzi Yeremiya wavugaga ati “Dore ndacyari muto sinashobora kuvuga”, Imana niyo ihumuriza uwo itoye ikamusezeranya kumuba hafi . Umusaseridoti atorwa mu bantu agashyirirwaho gufasha abantu mu mu mubano wabo n’Imana nk’uko ibaruwa yandikiwe Abahebureyi ibitubwira (He 5, 1-10) . Musenyeri yagarutse kandi ku butumwa bwa gisaseridoti, ati: “Umusaseridoti ni intumwa y’impuhwe z’Imana, ni umugabuzi w’imbabazi z’Imana, atumwe kunga abantu n’Imana…”

Padiri Dieudonné UWAMAHORO,

Perezida wa Komisiyo ya Diyosezi ishinzwe uburyo bw’itumanaho n’ibikorwa ndangamuco.