Itangwa ry’Ubupadiri muri Diyosezi ya Kibungo no kwishimira Nyiricyubahiro Antoni KARIDINALI KAMBANDA

Kuri icyi Cyumweru cya 3 cya Adiventi, kuwa 13 ukuboza 2020, Nyiricyubahiro Antoni KARIDINALI KAMBANDA yakiranywe ibyishimo muri Diyosezi ya Kibungo kandi atanga Isakaramentu ry’Ubusaseridoti kuri Padiri mushya.

Mu Gitambo cy’Ukaristiya yaturiye muri Kiliziya ya Katedrali ya Kibungo, Karidinali Antoni KAMBANDA yifatanyije n’Abakristu ba Diyosezi ya Kibungo mu gushimira Imana ingabire yahawe yo gushyirwa mu rwego rwa Karidinali, kandi atanga Isakaramentu ry’ubusaseridoti kuri Diyakoni Adrien UWIRINGIYIMANA, wabaye Padiri. Ni ibirori byitabiriwe kandi na Nyiricyubahiro Musenyeri Filipo RUKAMBA, Umwepiskopi wa Diyosezi ya Butare akaba na Perezida w’Inama y’Abepiskopi Gatolika mu Rwanda

. Mu rwego rwa Leta umushyitsi mukuru yari Nyakubahwa Guverineri w’Intara y’ i Burasirazuba ndetse n’Abayobozi b’uturere twa Ngoma na Kirehe n’abandi bayobozi mu nzego zitandukanye z’ubuyobozi bwite bwa Leta, abashinzwe umutekano n’abandi batandukanye.

Padiri Adiriyani UWIRINGIYIMANA yavukiye muri Paruwasi ya Rukara, Santarali ya Rwimishinya, kuwa 1 mutarama 1989, abatizwa kuwa 24 Nzeri 1989, akomezwa kuwa 25 nyakanga 2002

. Ubusaseridoti mu rwego rw’ubudiyakoni yabuherewe i Kibungo, kuwa 17 kanama 2019, muri Kiliziya ya Katedrali ya Kibungo, ari naho yaherewe Isakaramentu ry’Ubusaseridoti mu rwego rwa 2 kuri icyi cyumweru tariki ya 13 ukuboza 2020.

Padiri Dieudonné UWAMAHORO

Paruwasi Katedrali ya kibungo.